MIRZO ULUGʻBEK NOMIDAGI OʻZBEKISTON MILLIY UNIVERSITETIGA 2024-2025 OʻQUV YILI UCHUN IKKINCHI VA UNDAN KEYINGI OLIY TAʼLIMGA XUJJAT QABUL QILISH TARTIBI

1. Ikkinchi va undan keyingi oliy taʼlimga oʻqishga kirish uchun abituriyentlar 10 iyuldan 10 avgustga qadar (shu kuni ham) Oʻzbekiston Respublikasi Oliy va oʻrta maxsus taʼlim vazirligi tomonidan ishlab chiqilgan maxsus elektron https://ikkinchitalim.edu.uz/ tizim orqali roʻyxatdan oʻtadi.

2. Abituriyentlar roʻyxatdan oʻtishda maxsus elektron tizimga oʻzining shaxsiy maʼlumotlarini kiritadi va quyidagi hujjatlarni yuklaydi:

 - oliy maʼlumot toʻgʻrisidagi hujjatning nusxasi (yoki diplomdan koʻchirma - Oʻzbekiston Respublikasi oliy taʼlim muassasalarini davlat granti asosida oʻqib tugatganlar uchun);

 - oliy maʼlumot toʻgʻrisidagi hujjatning ilova nusxasi;

Bunda, xorijiy davlatlar taʼlim muassasalarining 1992 yil 1 yanvardan keyin berilgan diplomlari belgilangan tartibda nostrifikatsiyadan oʻtkazilgan boʻlishi lozim.

3.Ikkinchi va undan keyingi oliy taʼlimga oʻqishga kirish sinovlari suhbat tarzida (roʻyxatdan oʻtgan abituriyentlar soni belgilangan taʼlim yoʻnalishidagi qabul kvotasidan ortgan taʼlim yoʻnalishlari uchun imtihon tarzida) joriy yilning 15 avgustidan 25 avgust kuniga qadar OTMda oʻtkaziladi. Universitet kengashi qaroriga muvofiq 60420100-Yurisprudensiya: biznes huquqi taʼlim yoʻnalishiga konkurs yuqori boʻlishini inobatga olgan holda ushbu taʼlim yoʻnalishi boʻyicha kirish imtihonlari Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligi tomonidan test sinovlari shaklida oʻtkazilishi nazarda tutilgan.

4.Oliy taʼlim, fan va innovatsiyalar vazirligi tomonidan 2024-yil 31-mayda tasdiqlangan “Respublika oliy taʼlim muassasalarining taʼlim yoʻnalishlari roʻyxati va ularga mos test sinovi (kasbiy (ijodiy) imtihon) topshiriladigan fanlar majmuasi”dagi fanlar taqsimotini hisobga olgan holda 60420100 – Yurisprudensiya taʼlim yoʻnalishidagi asosiy fanlar (huquqshunoslik fanlari va chet tili) boʻyicha test sinovlari oʻtkazilishi boʻyicha qaror qabul qilingan. Bunda, Oʻzbekiston Respublikasi Vazirlar Mahkamasining 2019-yil 13-maydagi 395-sonli “Oliy taʼlim muassasalariga oʻqishga qabul qilishda milliy hamda xalqaro baholash tizimlari sertifikatlarini tatbiq qilish chora-tadbirlari toʻgʻrisida”gi qaroriga muvofiq test sinovlari majmuasiga chet tili (ingliz, nemis, fransuz tillari) fani kiritilgan bakalavriat taʼlim yoʻnalishlariga hujjat topshirgan va milliy yoki xalqaro sertifikatning tegishli darajalariga ega boʻlgan abituriyentlarga ushbu chet tili fanidan imtihonlarsiz belgilangan maksimal beriladi. Mazkur fanlardan test sinovlarini tashkil etish uchun Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligiga toʻgʻridan-toʻgʻri talabgorlardan toʻlov oʻtkazish koʻzda tutilgan taqdirda, oʻrnatilgan miqdorda talabgorlar tomonidan toʻlovlar amalga oshirilishi belgilangan.

5.Ikkinchi va undan keyingi oliy taʼlimga qabul qilish natijalari joriy yilning 30 avgustiga qadar eʼlon qilinadi.

6.Imtihon (yoki suhbat) natijalariga koʻra oʻqishga qabul qilingan talabalar oliy maʼlumot toʻgʻrisidagi hujjatning asli (yoki diplomdan koʻchirma — Oʻzbekiston Respublikasi oliy taʼlim muassasalarini davlat granti asosida oʻqib tugatganlar uchun) OTMga taqdim etadi.

7.Ikkinchi va undan keyingi taʼlimda oʻqish uchun talabalikka tavsiya etilgan shaxslar bilan OTM  oʻrtasida shartnoma rasmiylashtiriladi.

8. Ikkinchi va undan keyingi oliy taʼlimda oʻqish oʻquv rejalaridagi fanlar farqidan qatʼiy nazar, 2-kursdan boshlanadi. Ikkinchi va undan keyingi oliy taʼlimga oʻqishga qabul qilingan talabalar oldingi OTMda oʻquv rejasidagi taʼlim olgan fanlari boʻyicha fanlar farqi (akademik qarzdorlik) o'qishga kirgan oʻquv yili davomida kredit-modul tizimida toʻlov asosida oʻzlashtiriladi.

9. Ikkinchi va undan keyingi oliy taʼlimda oʻqish davomiyligi tegishli bakalavriat taʼlim yoʻnalishlari uchun belgilangan muddatdan bir yilga kam etib belgilanadi.

ASOS: Oʻzbekiston Respublikasi Vazirlar Mahkamasining 24.09.2021 yildagi “Oʻzbekiston Respublikasi Oliy taʼlim muassasalarida ikkinchi va undan keyingi oliy taʼlimni olish tartibi toʻgʻrisidagi nizomni tasdiqlash haqida” gi 606-son Qarori https://lex.uz/uz/docs/5657199.