O‘zbekiston Respublikasi Vazirlar Mahkamasining 2021-yil 24-sentabrdagi “O‘zbekiston Respublikasi oliy ta’lim muassasalarida ikkinchi va undan keyingi oliy ta’limni olish tartibi to‘g‘risidagi nizomni tasdiqlash haqida” gi 606-son Qarori bilan tasdiqlangan Nizomga muvofiq ikkinchi va undan keyingi oliy ta’limga qabul qilish tartibi (kirish imtihoni shakli, baholash mezonlari, imtihon o‘tkazish muddatlari) oliy ta’lim muassasasining xususiyatidan kelib chiqishi va oliy ta’lim muassasasi Kengashi tomonidan belgilanishi nazarda tutilgan.

  Yuqoridagilardan kelib chiqib, Mirzo Ulug‘bek nomidagi O‘zbekiston milliy universiteti Kengashining 2024-yil 28-iyundagi 9-son majlisi bayoniga muvofiq, 60420100-Yurisprudensiya: biznes huquqi ta’lim yo‘nalishiga ikkinchi va undan keyingi oliy ta’lim uchun konkurs yuqori bo‘lishini inobatga olgan holda ushbu ta’lim yo‘nalishi bo‘yicha kirish imtihonlari test sinovlari shaklida o‘tkazilishiga qaror qilingan.

Test sinovlarini shaffof va adolatli o‘tkazish, bilimi yuqori talabgorlarni saralab olish maqsadida ushbu yo‘nalish bo‘yicha test sinovlari Oliy ta’lim, fan va innovatsiyalar vazirligi huzuridagi Bilim va malakalarni baholash agentligi tomonidan o‘tkazilishi bo‘yicha qaror qabul qilingan.

Mazkur fanlardan test sinovlarini tashkil etish uchun O‘zbekiston Respublikasi Oliy ta’lim, fan va innovatsiyalar vazirligi huzuridagi Bilim va malakalarni baholash agentligiga to‘g‘ridan-to‘g‘ri talabgorlardan to‘lov o‘tkazish ko‘zda tutilgan taqdirda, o‘rnatilgan miqdorda talabgorlar tomonidan to‘lovlar amalga oshirilishi belgilanadi.

To‘lov miqdori va to‘lov bo‘yicha hisob raqam haqida qo‘shimcha ma’lumot beriladi.

Shuningdek, O‘zbekiston Respublikasi Vazirlar Mahkamasining 2019-yil 13-maydagi 395-sonli “Oliy ta’lim muassasalariga o‘qishga qabul qilishda milliy hamda xalqaro baholash tizimlari sertifikatlarini tatbiq qilish chora-tadbirlari to‘g‘risida”gi qaroriga muvofiq test sinovlari majmuasiga chet tili (ingliz, nemis, fransuz tillari) fani kiritilgan bakalavriat ta’lim yo‘nalishlariga hujjat topshirgan va milliy yoki xalqaro sertifikatning tegishli darajalariga ega bo‘lgan abituriyentlarga ushbu chet tili fanidan imtihonlarsiz belgilangan maksimal ball berilishi nazarda tutilgan.

Tegishli darajadagi va muddati o‘tmagan sertifikati mavjud abituriyentlardan universitet qabul komissiyasi tomonidan ochilgan maxsus telegram kanaliga sertifikatlarini yuborilishi so‘raladi. Telegram linki abituriyentlarga SMS orqali yuboriladi.

Ikkinchi va undan keyingi oliy ta’limga o‘qishga qabul qilinganlar avvalgi bitirgan oliy ta’lim muassasasining birinchi kursidan o‘tilgan fanlar o‘rtasida fanlar farqi bo‘lgan taqdirda ushbu fanlardan akademik qarzdor sifatida talaba tomonidan qayta topshirish jarayoni amalga oshiriladi. Qayta topshirish jarayoni esa kredit-modul tizimi bo‘yicha belgilangan tartib asosida tegishli to‘lov asosida amalga oshiriladi.

2024-07-26